【單車踩爆日本】 蘇皓兒＋陳安立鳥取單車遊 （景點足本地圖，持續更新）

講日本單車遊的《單車踩爆日本》旅遊節目話咁快就播到去第7集，兩位蘇皓兒（Chloe）及陳安立（Brian）就已經由和歌山踩到去鳥取了！一連6集的「鳥取篇」就會玩勻米子、境港、皆生溫泉 、大山、倉吉、羽合及鳥取市，大部分的單車路線都是老少咸宜，親子遊都無問題，為方便大家搵齊節目中鳥取景點，「日本見」幫大家先做好合集，大家按圖索驥即可出發！

第9集：鳥取 大山

蘇皓兒（Chloe）及陳安立（Brian）兩位主持呢集依然留在鳥取大山，因為呢度有太好玩、有太多地方要介紹了！今集主力在大山踩悠閒單車路線，玩盡當地的「大山まきばみるくの里」牧場、小林大橋、植田正治寫真美術館等人氣景點外，還在大山這個聖山的「宿坊・観證院山楽荘」體驗了坐禪！

#01. 大山牧場牛奶之鄉

大山牧場牛奶之鄉（大山まきばみるくの里） 面積約135公頃，住咗約有400隻牛牛的牧場，製牛奶軟雪糕最多一日可以賣出5,000杯，啲人係要特登山長水遠嚟食，超誇張！ 呢度出品嘅牛奶係日本少數可以做到養牛、取奶、奇工、出貨所有工序全數都在鳥取縣內進行，所以呢度的牛奶係奶香十足特別新鮮！牧場內除了有店舖出售自家的乳製品及手信外，還有餐廳及大大片的草原，大家仲可以近距離同可愛的牛牛打卡！

#02. 小林大橋

從大山牧場牛奶之鄉前往植田正治的路上，不妨繞道到小林大橋去，只因這條大橋的景色受到不少單車友的喜愛！要尋找大橋不難，就在道之駅「Daisen Garden Place」對出的國道52號之上。有心想拍到S形大橋與大山的全相，可以到在大山ペンション村旁的「小林大橋・展望駐車場」去。

#03. 植田正治寫真美術館

植田正治是首位獲頒法國文化藝術騎士勳章的世界著名攝影家，他出生及成長於山陰，有好大部分嘅作品都係以日本鳥取沙丘拍攝主題，而他的名作《少女四態》是1939年時的照片，大師搵咗 4 個女生鄰居去鳥取沙丘上拍攝，相片構圖係有齊他攝影嘅最重要的 3 個特色：沙丘、人物、擺拍。典藏約12,000件作品的美術館，本身也是榮獲藝術選獎文部大臣賞的著名建築師高松伸所設計，從館內望向大山，並從水面上可看到反射出的「大山倒影」，不少遊客來到都是為了影到一張「大山倒影與黑色禮帽」嘅打卡相！

#04. Hotel Daisen Shirogane

之前都有提到鳥取有個專為單車遊而設嘅Daijyobu System，設施遍布鳥取各地，就好似呢間在大山參道上的Hotel Daisen Shirogane，佢都係加入咗Daijyobu System入面的設施，單車友來到呢度可以為手機叉電、補給斟水外，仲可以來到浸溫泉沖個涼先繼續上路！

#05. 宿坊・観證院山楽荘

「宿坊・観證院山楽荘」是4百年以上的歷史宿坊，呢度係為專僧侶或善男信女準備「宿坊」嘅住宿設施，善男信女們都會來住一晚避世，第二朝再體驗坐禪、嘗過精進料理，當一個排毒假期！坐禪必須要將周圍的干擾降到最低，大家坐在好有歷史感的木造建築房間入面，盤起雙腿坐下，平心靜氣吐納，先擊打梆子為記，一聲梆子四聲缽響之後開始坐禪，然後再以兩聲梆子作結。之後會响呢個充滿靈氣嘅寺廟中，食精進料理山菜素齋可以調理身體 ，一次過洗滌身心。

#06. CYCLE BASE asahi 

單車專門店响全國有好多分店，叫得做單車基地就梗係大，店家樓高兩層，單車及相關嘅配件數量之多足夠Brian買到返香港係要跪玻璃 ！除咗可以買單車配件外，米子店仲有得租借單車。 如果單車友途中架單車有問題，可以拎去舖頭即時維修，服務貼心。

#07. 大山 ‧山之家 SCHIHEIL DAISEN

呢間叫做山之家 SchiHeil（シーハイル）嘅小旅館，被綠樹森林包圍住嘅小石屋，成個小旅館就係歐洲個啲專門提供住宿的餐廳Auberge咁，呢間小旅館都係由一家人去經營，爸爸係廚師，媽媽係服務擔當，貫徹酒店家庭式嘅溫暖氣氛，成間酒店嘛係得13間房，每間房都係以雪之下「ゆきのした」、山繡球「山あじさい」、夏椿「なつつばき」等大山嘅高山植物來命名，令人好似去咗歐洲山城嘅小屋。

第8集：鳥取 大山

來到鳥取編的第二集，蘇皓兒（Chloe）及陳安立（Brian）離開了鬼太郎之鄉，轉戰位於山陰山陽地區最高峰——大山， 呢座日本100名山被當地人視為聖山，更有不少單車友視當地舉行的「Tour De Daisen」年度單車活動為必踩盛事， 全長81.3公里的路線爬升高度約2,200米，途中可以看到好靚的壯觀自然景色，雖然今次兩位主持Chloe及Brian未有得參加呢個單車界的盛會，但佢哋兩個都踩咗條相對平易近人、老少鹹宜的落山路線，一樣可以睇到大山大海的絕美景色！

#01. 森之國

大山是喜歡戶外狂熱者的天堂，呢條碌落山單車行，起點就係位於森之國。呢個野外歷奇樂園， 除咗會有導遊帶隊踩單車外， 仲有齊兒童繩索遊樂設施、運動場、滑草場、迷你高爾夫練習場、馬場及露營場地。森之國的 Downhill路線全程22公里，高低落差達850米的下山路，路線會經過大片稻田草地、河溪同埋牧場，最後就會以木料海岸為終點，大家可放心，去到終點不用走回頭路，有私家旅遊巴將大家送返上山㗎！

第一站：豪円山狼煙台（豪円山のろし台）

無上又點會有落，教練就帶住佢哋兩個出發，特登繞路登上大山半山腰上的「豪円山狼煙台」展望台！呢個可以零死角睇到大山北邊嘅樹海壯闊景色，仲可以望埋日本海嘅海景。從停車場到展望台短短嘅15分鐘登山路，已經令到單車新手嘅Chloe踩得死去活來！

第一站：川床登山口

從觀景台出發到下一個目的地「川床登山口」，呢條路與尾高道、橫手道等同為大山地區古老的朝聖之路，同時亦都係以前去大山嘅牛馬交易市集必經之路 ，後來當地百姓就將古道修繕成為石板路。前人栽樹，後人乘涼，穿過大山茂密的山毛櫸林，就可以學吓兩位主持咁，在河溪嘗嘗當地得地下水。因為呢度有好多縱橫交錯嘅河溪，呢啲地下水經過岩層及大山原始山毛櫸林嘅過濾，唔少行山友和單車友都會去一啲較安全的水源去飲清澈的地下水。

單車小貼士！

線出發前，大家要揀車、戴頭盔、做足熱身運動，全程有教練傍實，往南下坡，途中會停靠幾個休息點。據Brain教路，落斜唔想炒車 ，一定要完全了解自己的單車 ，分清前後 Brake，輕力按剎車掣，施力要漸進，用後輪剎車 ，不要緊握煞車掣，做足安全措施，就萬無一失。

第三站：平澤牧場

身處大自然理果然好容易把人與人的距離拉近，在大山遇上了教練的老朋友平澤牧場老闆娘。老闆娘平澤朝子熱愛大山，佢不停搞唔同嘅工作坊、陶藝教室、拉麵店，只為吸引到更多人來到大山，親身感受大山的魅力。老闆娘本身响呢度經營羊牧場和民宿已經13年 ，但後來因為年紀大體力衰退的關係，於2019年3月送別咗牧場內最後一隻羊「龍太郎」後， 就將牧場的土地改成花田 ，之前透過眾籌，成功起咗一座可以睇到大山北壁展望台，勁有heart!

終點：木料海岸

由平澤牧場出發，沿途見到嘅都係青草地、農家，周圍都好靜，聽到風聲雀仔聲，同最原始的大自然接觸確實係爽。成個落山單車路線嘅行程，路經國立公園散步，喝了口無污溪水，走到牧草場滾地沙，進入村莊繞到蔚藍海岸 ，破風而行看盡好似明信片的畫面。

第7集：鳥取 米子、境港市

節目由第7集開始，兩位主持蘇皓​​兒及陳安立由和歌山轉戰鳥取！今集先去到處處都是鬼太郎的境港市，佢哋兩個被「鬼」揞眼指使下，從好友變競爭對手爭奪鬼太郎送出的終極大獎，呼風喚雨嘅好勝女神玩到濕晒身！

#01. JR米子RENTAL CAR米子営業所

响鳥取嘅單車路線都好有規劃， 周圍都有好多自行車專用道及專為單車友設計的配套設施，而大家可以在鳥取多多利用「單車＋鐵路遊」，體力或是天氣唔好嘅時候，可以彈性調整而不會影響到原本的行程。响鳥取JR米子車站，為咗方便大家帶埋架單車上火車，呢度就特地推出摺車租借服務，租借手續好簡單，填張表就得，雖然只限原地借還，但租一日只係￥1,000，朝8晚6，方便大家沿JR的境線，去到邊踩到邊！

#02. JR鬼太郎列車

租完單車就可以摺埋架單車上JR，由JR米子車站坐到去境港，大約45分鐘左右，話晒境港係《鬼太郎》漫畫家水木茂嘅故鄉，世畀各地好多漫畫迷都會慕名而嚟。JR境線來回米子及境港就特別設計咗「JR鬼太郎列車」，呢架車分別以鬼太郎、貓女、眼球老爹、臭鼠男、子泣爺爺、撒砂婆婆為主角， 車上可以搵到好多佢哋嘅裝飾， 而路線所行經嘅16個車站會都以不同妖怪命名㗎！

#03. ⽔⽊茂記念館

境港有「妖怪王國」之稱，因為畫《鬼太郎》嘅漫畫家水木茂係出生於境港市，而令到呢度聲名大噪！由境港站沿住水木茂大道往⽔⽊茂記念館，呢條約800米長嘅商店街，除咗排列著177座妖怪青銅像外，仲有⽔⽊茂記念館、妖怪神社、妖怪樂園、手信店等，隨處可見大量鬼太郎動畫中的角色及人物。不過大家要留意，⽔⽊茂記念館將於2023年3月9日起休館一年， 原址拆卸重建，預計2024年4月完成翻新！

#04. ゲゲゲの妖怪楽園

離水木茂紀念館只要2分鐘路程的妖怪樂園，入口處已有大家熟悉的妖怪們列隊迎接！復古風風樂園重現「鬼太郎之家」的畫面，廣場四周到處都是鬼太郎主角們的打卡位，入面有妖怪茶屋、攤位遊戲，仲有手信店賣鬼太郎嘅原創商品。

#05. 妖怪食品研究所

在水木茂大道上常常見到有女生拎住好可愛的眼球老爹和菓子打卡，呢粒咁搞笑的和菓子可以在「妖怪食品研究所」入手。讓人意想不到的是玩味十足的眼球老爹和菓子原來是由老店彩雲堂製作，呢粒「眼球」外層的寒天，眼珠是羊羹，而最內層藏著的是紅豆餡，一個人完食一粒會很飽，最好還是同朋友分享！

#06. 釘谷履物店

在水木茂大道上有很多賣鬼太郎雜貨的手信店，呢間創業於明治40年（1907年）的木屐專門店，可以拎到好多鬼太郎木屐，96歲的店主釘谷爺爺非常健談，仲會穿上木屐示範如估著住木屐健步如飛地行走，大家都忍唔住都要買返對木屐拖鞋做手信！

#07. 妖怪神社

於2000年1月1日開幕的妖怪神社， 先被神社門外的「眼珠老爹淨手池」吸引，境內有超過3米高的巨大黑御影石和樹齡300年的櫸樹，保佑大家遠離惡運。大家可以到神社旁邊的商店，入手鬼太郎及妖怪們圖案的護身符和繪馬等。

#08. le thé 池屋

大山當地乳牛會在草原上放牧，山好水自然養出好牛，有「牛奶之鄉」之稱的大山 ，所生產的牛奶品質極高！而這家日式茶屋使用了位於大山山腳的岸田牧場出產嘅優質牛奶來做雪糕 ，這裡也有用到當地水果做成不同的芭菲，Chloe和Brian就點了「二十世紀梨、年輪蛋糕軟雪糕」和「蕨餅、白玉紅豆抹茶軟雪糕」！

#09. 天然溫泉 境港 夕凪之湯 御宿 野乃

在境港想住一晚，真心推介在境港站對出的「夕凪之湯 御宿 野乃」！ 入門口就已經見到塌塌米地板的大堂，大家脫下鞋子放入專屬的鞋櫃中，就可以赤腳在館內放輕鬆地走來走去！頂樓溫泉有齊大浴湯、露天風呂、水風呂、桑拿浴，戶外的露天溫泉仲可以浸住溫泉睇無敵境港市夜景，開放到翌日朝早，大家想幾時去泡都得！而這裡晚上更有拉麵做宵夜，朝早的早餐可自製海鮮丼, 膳食一流呀！

#10. 妖怪影繪

呢個「妖怪影繪」投影騷，每日會响水木茂紀念館前播放嘅，由日落到晚上10點準時開騷，每次投影時間大約8分鐘，將「鬼太郎」漫畫嘅經典場面足本播放。