【#日本熱話】大家成日抱怨愈來愈多日本餐廳都唔接受外國人訂位，原來有好多小店拒絕遊客到訪是因為好多旅客訂位之後，唔通知餐廳取消，直接NO SHOW！今次受害餐廳是周奕瑋Jarvis在《周遊關西》介紹過嘅京都天婦羅專門店「天ぷら 天寅 京都新風館店」，老闆頂唔住呢班失聯旅客的惡行，搞到Jarvis要在IG出帖呼籲大家要做個「有溫度的遊客」，訂咗位要負責，「唔好No Show，就算去唔到都聯絡返舖頭啦」。
失格港人NO SHOW 周奕瑋呼籲：去唔到都聯絡返舖頭
近日遊日達人周奕瑋Jarvis就受到佢喺《周遊關西》介紹過嘅京都一間天婦羅小店所托，請港人高抬貴手，訂位唔出現都打個電話通知：「最近收到老闆嘅聯絡，希望可以幫幫佢手。 事緣係，佢好感激好多睇咗節目嘅朋友去支持佢， 都好多謝大家嘅預約。不過可能當中有部份大頭蝦唔記得咗、或者臨時行程有變嘅朋友，預約咗之後當日冇出現….但又無Cancel Booking… 對於小店嘅營運來講，實在係會添加壓力㗎。 希望大家可以做一個有溫度嘅遊客、有溫度嘅顧客。 唔好No Show，就算去唔到都聯絡返舖頭啦！」筆者同樣遇過唔少日本餐廳抱怨港人訂枱NO SHOW呢種惡習，對於愈來愈多日本小店唔接受港人訂枱，真係只有用「自作孽」來總結，無得食絕對係咎由自取！
FB/IG無得DM訂位 食評網一個月前接受上網預約
就正如Jarvis所講「希望大家可以睇晒個post啲字」，餐廳的IG係有寫住「DMでの予約は受けたまっておりません」，唔識日文嘅人可以認住呢句嘢的意思係「DM係唔接受預約㗎」，所以大家就唔好DM去訂枱（或者去抱怨人哋點解唔覆）。而佢IG係有清楚地附上埋「食べログ」的預約網址，網上預約喺一個月前就可以訂枱。嫌麻煩可以拜託識日文嘅朋友、又或者酒店職員、又或者電訊商（據聞1010的客戶有專人免費服務）打去訂枱，都係個句訂咗位，記得準時到，唔好NO SHOW啦！
