雖然香港都有Donki，但遊日時都總會繼續逛買零食同手信，順便聽返原裝日文洗腦BGM！從今以後Donki fans仲可以去埋旗下新副線DOMISE(ドミセ)，剛於8月24日响涉谷新商場「道玄坂通」開幕，9月仲會登錄大阪八尾，究竟呢間新店賣的是什麼？
DOMISE(ドミセ)：驚安之外仲有驚喜
DONKI全名Don Quijote（唐吉訶德），不過無人會咁稱呼佢，曾有段時間叫激安之殿堂，後來改為驚安，給大家無限驚喜。近年海外擴張，DONKI在日本除了開設旗艦店MEGA DONKI之外，最近就以DOMISE(ドミセ)出現，以「驚喜專門店」作定位，主打DONKI旗下「情熱價格」的自家品牌出品，除了零食、調味料與日用品之外，亦有不少OEM電器、家品等，其實响香港店都搵到不少。
新店DOMISE(ドミセ)主打返「情熱價格」平價貨，除咗驚安（價錢便宜）之外，仲會抽出每件產品令人驚喜、驚訝嘅原因，店內用上DONKI慣用的手寫POP介紹，而且程度更誇張，招紙滿天飛，例如店內有個滯銷減價區售賣「因為疫情入多咗貨」的電鍋，略懂日文嘅必定逛得好開心。
店內亦設有數榜Ranking區，會用爆笑方式數10款自家產品，例如產品名字最長的Top 10產品（No.1 是長達 318字的杮之種）、深夜難以忍口的不道德商品Top 10等，邊行邊逛總有令人發笑的驚喜發現！
DONKI亦首次引入裸買概念，將提供日本零食、Nuts類零食；店內還設有一部份讓顧客投票好/不好的產品corner，解釋產品開發理念與賣點，但好不好用、值不值得賣就由客人撳掣投票，如此一間DOMISE堪稱DONKI的主題樂園，為大家平時可能忽略、只看價錢的平價貨品再推銷，非常好玩！
道玄坂通新食店及酒店登場
新DOMISE所在地曾是DONKI舊店，改建完成樓高28層的新大樓，商店和餐廳只佔2層，樓上主要為辦公室及8月29日新開幕的Hotel Indigo。除了DOMISE，新店方面值得留意的包括猿田彦珈琲、來自意大利的百年Gelato Giolitti、由紐約開過來的The City Bakery等。
