大阪酒店｜心齋橋激方便 2品牌合體 極黑型格酒店 Mercure Tokyu Stay Namba

大阪住邊好？通常有兩派：一派是心齋橋/難波一帶方便全日血拼，另一派就鍾情梅田貪其交通方便去埋京都神戶奈良等，今次介紹呢間內外都用上黑色做主調嘅新酒店，就係前者，距離難波地鐵站5分鐘、响正心齋橋LV對面嘅Mercure Tokyu Stay Namba Osaka。

酒店名沒有打錯字，真係結合日本優質商務酒店品牌Tokyu Stay，以及Accor旗下Mercure二個品牌，22年12月1日開幕，Tokyu Stay出名自己房有埋洗衣機同迷你廚房，加埋Mercure嘅設計感，新酒店由外觀、大堂到房間都走黑色型格設計，最重要係位置極方便，位於美國村同心齋橋商店街之間，一個Block之外就係心齋橋LV旗艦店，距離固力果招牌、心齋橋SOGO不用5分鐘腳程，落街就可以買嘢食嘢，超級方便！

酒店最basic房係226呎標準雙人床房，但就不設洗衣機，較高級的客房才有私人洗衣機方便日日洗衫，（但酒店本身也設有洗衫房可供使用），部份更設小廚房及微波爐，食宵夜最方便。另一特別之處是洗手盤不設在浴室內，是以開放式對住房間，浴室則不像一般日式酒店的防地震膠囊浴室，相對寬敞舒適！