【廣島見】日本見小編話咗要做 廣島觀光大使， 即刻坐言起行飛嚟廣島，親身搵定好嘢食同大家分享！11月的天氣開始轉涼， 肥美的廣島蠔當造，梗係要去蠔小屋（牡蠣小屋）食返夠本！今次介紹嘅呢間島田水産是在宮島口附近，小編响11月1日和2日朝早去，都有唔少當地人同遊客來幫襯，70分鐘任食廣島蠔放題採全自助形式，每人折合只係約$136 超平！
全自助燒蠔放題 街坊示範蒸煮蠔山最快熟
大家就在門口先拿附有落單QRCode的座席柯打紙、工具及食器，然後坐返指定的座位等職員送上炭爐，食完先畀錢，再來就去拎一籃籃的生蠔，即刻開餐！睇當地人燒蠔係有竅門，先將蠔（平面）燒2分鐘，反轉再燒焗2分鐘，燒焗時可以將生蠔堆疊成山，見以此方法燒蠔的朋友，在放題限時內快手地吃了過百隻，職員會在夠鐘前嘅15分鐘，開咪提醒食到忘我嘅食客，時間剛剛好夠大家燒多轉！。
養蠔養咗3百多年嘅島田水産，响宮島一帶水域有自己的蠔棚養蠔，朝早不時會舉行一小時漁師採蠔見學（每位約$165），記者7點正坐船出發前往宮島附近嘅蠔棚睇漁師採蠔，以拖拉機將10米長的蠔排（約重兩噸）拉高傾倒到漁船，場面非常震撼！睇完蠔，船家仲會去駛埋去睇嚴島神社的海中大鳥居，旭日初升，呢個角度睇大鳥居真係第一次！遊完船河返到蠔小屋食燒蠔及蠔粥，隻隻燒蠔肥美又爆汁，呢個早餐真係食得好「蠔」！
島田水産
地址：広島県廿日市市宮島口西1-2-6
營業時間：【牡蠣小屋任食蠔放題】平日10am-4pm 、周六10am-8pm、周日10am-5pm；【漁師採蠔見學】10-5月 周一至六7am-8am（10分前集合、前日預約）
收費：【牡蠣小屋任食蠔放題】平日(70分鐘 ) 、周六日及假期（60分鐘）￥2,750 小 學生￥1,100；【漁師採蠔見學】成人￥3,300 4歳以上至高中生以下￥1100、3歳以下免費
網址：https://shimadasuisan.com/
