【福岡酒店】親子遊之選：博多站THE Royal Park Hotel Fukuoka

多得廉航，近年福岡成為港人遊日熱點之一，勝在機程短，市內交通方便，乘搭JR觀光列車，即可從博多出發，遊走熊本、大分、佐賀、長崎等多個名勝，吸引唔少人3日2夜快閃之餘，長假期亦是家族旅行首選。一家四口（或以上）想搵間啱小朋友、老人家住嘅酒店好難，推薦離博多站5分鐘步程嘅THE Royal Park Hotel Fukuoka，位置靜中帶旺，空間感十足！揀間啱嘅酒店，可減少行程上好多嘅煩惱。

房間闊落開到喼
日本流行商務酒店，方便但房間細、配套少，有時連行李都未必打得開。THE Royal Park Hotel Fukuoka設有普通樓層及Premium樓層，普通單床Double Bed之外，其雙床房大部分面積約為25平方米以上，仲有三床房型可選，一家四口、兩大兩細，打開兩隻喼都無難度。Premium樓層更設達50平方米以上的套房，想住得豪華少少亦可。

酒店設早餐放題
「去日本，梗係出去食喇！」好多人都會咁諗，但其實到真係扶老攜幼，酒店有個早餐放題都有助減少好多問題。酒店餐廳「Precious ONO HAKATA」每朝設中華料理式早餐放題，每人￥2,200或可揀選包早餐Package，提供粥、茶漬飯及30多款中華料理，簡單一句：有熱嘢食，大人細路都可以自己揀食咩！同時亦提供午、晚餐。（早餐時間：早上6:30至11點、10點Last Order）

位於市中心 15分鐘到機場
福岡市主要分為博多、天神、中洲三大酒店區，一家大細建議揀選極度方便的博多，尤其車站附近，來往機場15分鐘左右，叫車方便之餘，鄰近多個商場均設有餐廳樓層，搵食唔成問題，加上有夾公仔機、超市及手信店，臨入機場方便再掃貨！THE Royal Park Hotel Fukuoka離博多站將5分鐘步程，位於較寧靜的JR博多站「博多口」一帶（紫築口較為熱鬧），帶住小朋友都唔擔心。