拍手啦！Chiikawa又有新搞作，拉麵店之後，麵包店「Chiikawa Bakery」將於10月29日於原宿東急Plaza三樓開張啦！身為Fans當然要飛去賀下佢哋，嗚吖！不過Chiikawa POPUP一向唔係你話想去就有得去，一系列嘅抽籤、排隊、搶籌、限量，點都好，呢啲都難唔到Chiikawa忠粉，小編就立即親身試下網上抽選，試下一個普通人要點樣先入到場！（睇到最尾唔好嬲，謝謝）
「Chiikawa Bakery」有咩玩？一間麵包店 一間專賣店
未睇點抽飛入場前，不如睇真啲值唔值得飛過去幫襯先。Chiikawa Bakery共分2間店（抽飛入場亦分2部份），先是麵包店，推出一系列巧得意嘅Chiikawa麵包，種類比想像中多，亦相信識做生意嘅Chiikawa會推出限定版Menu！不懷疑，入得場都想要（曬黑版）Chiikawa、小八、兔兔嘅大面麵包，隔離磅麵包都好想要，每款一人限定買一個Only！
Chiikawa Bakery限定商店
另一條隊就直入商店，暫時未知呢間麵包店係唔係POPUP，亦未知開到幾時，所以一如以往引發「搶Goods潮」。今次Bakery風商品以啡色為離，烤焗版嘅Chiikawa真係好搞笑！同樣，一人一件Only，代購頭痛了。
點入場？10月8日起已可於上網預約
打開官網大大粒字寫住有得網上預約， 立即入去睇睇。
粉紅色係「Chiikawa Bakery」買物券連事前預約券說明，此預約券需事前先付每人￥1,000（最多可抽選4人入場，未連網購手續費），而黃色頁面是Goods Popup Shop入場抽選，則不需事前收費。先行抽選至10月14日截止，10月18至22日會收到結果及入錢購票。
重點：10月25日中午12點開始有「一般發賣，即係人人都可以搶了！
嘗試一下抽選，過程唔算難，只要成為Lawson會員即可，提提大家，要以手機打開連結，不同用電腦。
進入連結後，Lawson會自動進行翻譯，有「麵包店」及「商店」可選，依個人日子、時間查看，每人最多可抽4張，直至「登入」時遇到困難，嘗試使用日本VPN再試方成功登入（心諗：呀！日本限定？）
Lawson首輪抽選只限電子票，所以是「僅限日本居住者」限定！崩潰了！
入場需有Lawson戶口外，需要以日本登記之電話登入App獲取即時QR Code入場。有日本朋友或有日本電話嘅朋友可以繼續抽落去。
其他旅客請等10月25日一般販賣公開發售詳情，嗚吖！
Chiikawa Bakery
地址：東京都渋谷区神宮前4-30-3 東急プラザ表参道「オモカド」3階
時間：11:00〜20:00
