【大阪美食】話題創意拉麵｜草莓shortcake拉麵期間限定登場

雖然話食物不應攞嚟玩，但去年香港引進一款日本發明嘅拉麵食法，將一cone軟雪糕加入拉麵一齊食，雪糕溶化後同濃味湯底帶出嘅化學作用，味道竟然唔差，在香港一度排長龍爭相試食！發明呢款雪糕拉麵嘅日本原店フラン軒（Franken），位於大阪心齋橋商店街，今年再接再厲「玩食物」，在踏入士多啤梨當造期推出一款期定口味「草莓shortcake味噌拉麵」。

草莓shortcake味噌拉麵

呢款期間限定「辛甘miso」，係將一件士多啤梨忌廉蛋糕放在味噌湯拉麵之上，食法一樣要將佢溶入湯頭，然後撈埋嚟食，味道如何？有日本網民話毫無違和感，蛋糕浸湯似食麩皮，辛辣湯加上草莓酸又幾夾。

唔講唔知，フラン軒其實係香港都有分店嘅〇de▽、鶏soba座銀之姊妹店，今次推出嘅係「辛甘miso」拉麵第3彈，全部都係期間限定，第一代係棉花糖，第二代係軟雪糕，今次就玩士多啤梨蛋糕！

除咗咁獨特口味嘅拉麵，較少見嘅仲有芝士撈麵，在中華麵之上刨上大量mozerella芝士碎，像粉雪一樣蓋滿拉麵，再加上蛋黃及叉燒，味道齋睇都知好味！另外招牌出品仲有配上鴨肉、蛋絲、青瓜絲的中華冷麵變奏湯麵，配埋炒飯做set，冬天一定夠飽暖。