很多香港人都喜歡食蠔，冬天去九州玩的話，大家都會專程去福岡糸島的蠔小屋食燒蠔，原來除了福岡之外，佐賀都可以食到燒蠔！每年11月中到3月中左右，「道の駅鹿島」旁邊的蠔小屋「Gatakko House（ガタッコハウス）」都會可以食到炭火燒蠔，主要供應來自有明海沿岸的「有明牡蠣」（スミノエガキ），特點是貝柱大，肉身肥厚，特別鮮味。
有明海的「潮差」非常大，所以有豐富的浮游生物作蠔的食糧，所以鹽分比較少。另外，因為在退潮時長時間被太陽曬，蠔為了保護自己，所以儲備較多養分，所以有明牡蠣的鮮味較強，亦特別美味！
遊客進入「Gatakko House」後，先揀選想食的東西，再去付款，然後會有專人安排你入座。我們到訪這天，除了有明牡蠣外，還有佐世保牡蠣，兩款都是1,200円一籃，大約有6-7隻左右。另外還有檜扇貝及海螺，同樣是1,200円一籃，亦可以散叫，每隻250円。
蠔小屋會提供勞工手套、鐵鉗、筷子、碟及醬醋，基本上將所有蠔放上炭爐，等待開口，就可以隨個人喜好加上醬酒或醋食，有明牡蠣隻隻脹卜卜，燒至半熟，剛剛好，特別鮮甜！
道の駅鹿島「Gatakko House（ガタッコハウス）」
地址：佐賀県鹿島市音成甲4427-6
營業時間：11月中至3月中 10am-5pm
網址：https://www.kashimacity.com/play/mitinoeki/index.html
交通：由福岡開車前往約2小時
